ਸਕੂਲ ਆਫ਼ ਐਮੀਨੈਂਸ (SOE) ਵਿੱਚ ਦਾਖਲੇ ਲਈ ਨਵੀਆਂ ਹਦਾਇਤਾਂ: ਅਕਾਦਮਿਕ ਸਾਲ 2026-27
ਪੰਜਾਬ ਦੇ ਸਰਕਾਰੀ ਸਕੂਲਾਂ ਵਿੱਚ ਪੜ੍ਹਨ ਵਾਲੇ ਹੋਣਹਾਰ ਵਿਦਿਆਰਥੀਆਂ ਲਈ ਇੱਕ ਵੱਡੀ ਖ਼ਬਰ ਹੈ! ਸਿੱਖਿਆ ਵਿਭਾਗ (SCERT) ਵੱਲੋਂ ਅਕਾਦਮਿਕ ਸਾਲ 2026-27 ਲਈ ਸਕੂਲ ਆਫ਼ ਐਮੀਨੈਂਸ (SOE) ਵਿੱਚ 9ਵੀਂ ਅਤੇ 11ਵੀਂ ਜਮਾਤ ਦੇ ਦਾਖਲਿਆਂ ਸਬੰਧੀ ਨਵੀਆਂ ਹਦਾਇਤਾਂ ਜਾਰੀ ਕਰ ਦਿੱਤੀਆਂ ਗਈਆਂ ਹਨ।
ਮੁੱਖ ਤਾਰੀਖ: ਪ੍ਰੋਵੀਜ਼ਨਲ ਦਾਖਲੇ ਦੀ ਪ੍ਰਕਿਰਿਆ 01 ਅਪ੍ਰੈਲ 2026 ਤੋਂ ਸ਼ੁਰੂ ਹੋ ਰਹੀ ਹੈ।
ਦਾਖਲਾ ਪ੍ਰਕਿਰਿਆ ਦੀਆਂ ਮੁੱਖ ਗੱਲਾਂ:
- ਪ੍ਰੋਵੀਜ਼ਨਲ ਦਾਖਲਾ: ਪ੍ਰਵੇਸ਼ ਪ੍ਰੀਖਿਆ (Entrance Exam) ਪਾਸ ਕਰਨ ਵਾਲੇ ਵਿਦਿਆਰਥੀਆਂ ਨੂੰ e-Punjab ਪੋਰਟਲ ਰਾਹੀਂ ਆਰਜ਼ੀ ਤੌਰ 'ਤੇ ਦਾਖਲਾ ਦਿੱਤਾ ਜਾਵੇਗਾ।
- ਫਾਈਨਲ ਦਾਖਲੇ ਦੀ ਸ਼ਰਤ: ਵਿਦਿਆਰਥੀ ਦਾ ਦਾਖਲਾ ਤਾਂ ਹੀ ਪੱਕਾ ਮੰਨਿਆ ਜਾਵੇਗਾ ਜੇਕਰ ਉਹ ਆਪਣੀ ਪਿਛਲੀ ਜਮਾਤ (8ਵੀਂ ਜਾਂ 10ਵੀਂ) ਦੀ ਬੋਰਡ ਪ੍ਰੀਖਿਆ ਵਿੱਚੋਂ ਪਾਸ ਹੁੰਦਾ ਹੈ।
- 11ਵੀਂ ਜਮਾਤ ਲਈ ਪਹਿਲ: SOE ਸਕੂਲਾਂ ਵਿੱਚ ਪਹਿਲਾਂ ਤੋਂ ਪੜ੍ਹ ਰਹੇ 10ਵੀਂ ਦੇ ਵਿਦਿਆਰਥੀਆਂ ਨੂੰ 11ਵੀਂ ਵਿੱਚ ਪਹਿਲ ਦਿੱਤੀ ਜਾਵੇਗੀ, ਉਸ ਤੋਂ ਬਾਅਦ ਖਾਲੀ ਸੀਟਾਂ ਨਵੇਂ ਵਿਦਿਆਰਥੀਆਂ ਨੂੰ ਦਿੱਤੀਆਂ ਜਾਣਗੀਆਂ।
ਸੈਕਸ਼ਨ ਅਤੇ ਸੀਟਾਂ ਦੀ ਵੰਡ:
ਵਿਭਾਗ ਅਨੁਸਾਰ ਹਰੇਕ ਸੈਕਸ਼ਨ ਵਿੱਚ ਵਿਦਿਆਰਥੀਆਂ ਦੀ ਗਿਣਤੀ ਕੁਝ ਇਸ ਤਰ੍ਹਾਂ ਹੋਵੇਗੀ:
- 9ਵੀਂ ਜਮਾਤ: ਘੱਟੋ-ਘੱਟ 20 ਅਤੇ ਵੱਧ ਤੋਂ ਵੱਧ 36 ਵਿਦਿਆਰਥੀ।
- 11ਵੀਂ ਜਮਾਤ: ਘੱਟੋ-ਘੱਟ 10 ਅਤੇ ਵੱਧ ਤੋਂ ਵੱਧ 32 ਵਿਦਿਆਰਥੀ।
ਕਾਊਂਸਲਿੰਗ ਸਬੰਧੀ ਜਾਣਕਾਰੀ:
ਦਾਖਲੇ ਲਈ ਹਰ ਸਕੂਲ ਵਿੱਚ ਇੱਕ ਵਿਸ਼ੇਸ਼ ਕਮੇਟੀ ਬਣਾਈ ਗਈ ਹੈ। ਫਾਈਨਲ ਦਾਖਲੇ ਲਈ ਕੁੱਲ 3 ਕਾਊਂਸਲਿੰਗਾਂ ਕਰਵਾਈਆਂ ਜਾਣਗੀਆਂ। ਜੇਕਰ ਕਿਸੇ ਇੱਕ SOE ਸਕੂਲ ਵਿੱਚ ਸੀਟਾਂ ਭਰ ਜਾਂਦੀਆਂ ਹਨ, ਤਾਂ ਵਿਦਿਆਰਥੀ ਆਪਣੀ ਸਹੂਲਤ ਅਨੁਸਾਰ ਨੇੜਲੇ ਦੂਜੇ SOE ਸਕੂਲ ਵਿੱਚ ਵੀ ਦਾਖਲੇ ਦੀ ਕੋਸ਼ਿਸ਼ ਕਰ ਸਕਦਾ ਹੈ।
ਫੀਸਾਂ ਬਾਰੇ: SOE ਸਕੂਲਾਂ ਵਿੱਚ ਵੀ ਉਹੀ ਫੀਸਾਂ ਅਤੇ ਫੰਡ ਲਏ ਜਾਣਗੇ ਜੋ ਬਾਕੀ ਆਮ ਸਰਕਾਰੀ ਸਕੂਲਾਂ ਵਿੱਚ ਲਏ ਜਾਂਦੇ ਹਨ।
